Nagpromiso ro 3rd Infantry Division (3ID) it Philippine Army nga haom sanda magta-o it seguridad sa mga kandidato nga nagadaeagan sa eleksyon nga tuyo magpangampanya sa mga maeayo nga barangay, kapin pa sa mga lugar nga may nareport nga rebeldeng grupo.
Raya hay base sa naging salaysay ni Major General Benedict Arevalo, 3ID commander.
Ginpahanumduman man nana ro mga kandidato nga indi magta-o it “campaign tax” sa mga rebelde.
Ro 3ID hay mapakaeat it mga suldado sa mga strategic areas ag subaybayan ro mga rebelde.
Nagpaandam man ro Regional Task Force to End Local Communist Armed Conflict (RTF-ELCAC) sa mga kandidato kuntra sa pagta-o it suporta sa Communist Party of the Philippines – New People’s Army (CPP-NPA).
Base kay Assistant Provincial Prosecutor Flosemer Chris Gonzales, spokesperson it RTF-ELCAC, sin-o man nga indibidwal nga magta-o it suporta sa mga komunista hay magapangatubang sa pag-eapas sa Anti-Terrorism Financing Act of 2012 ag Anti-Terror Act of 2020. Rason nga likawan nga makipag-alyansa sa CCP-NPA.
Ro kapareho nga mensahe hay ginpahayag man ni Police Brigadier General Flynn Dongbo, Western Visayas police director./JIL B. LACSON
