BICOL – ISINAGIBO kan Bureau of Fire Protection o BFP-Bicol an graduation ceremony para sa mga dog trainers kasabay an saindang mga K9 dogs na matrayumpong nakapagtapos sa Search and Rescue Dog Trainers Course.
Pinangenotan mismo ni BFP Bicol, Regional Director Senior Superintendent Ricardo Perdigon an seremonya para sa bente unong mga dog handlers na miyembro kan Special Rescue Force (SRF) asin saindang search and rescue dogs na iyo man minakompwesto sa kaenot enoteng BFP-K9 unit sa nacion.
An sinambit na mga high-breed dogs an igwang training sa search and rescue asin pigkokonsiderar na mga “working dogs” kun saen gamit an saindang matarom na pamarong ,kayang mapakaskas an search and retrieval operation na ginigibo pagkatapos kan kalamidad o aberya.
Segun ki RD Perdigon, matapos an labi anom na bulan na training naging “exceptional” an performance kan mga trainees maging an mga K9 units asin nakatalaan soboot ninda ining ipalakop sa man iba ibang mga probinsya sa rehiyon.
Tinawan linaw man kaini na an bente unong mga search and rescue dogs an donasyon gikan sa private sectors asin an pondo man kan programa an suportado kan gobyerno.
Mantang pinasalamatan man kan opisyal an Coast Guard sa training kan saindang mga pesonahe siring man an lokal na gobyerno kan ciudad nin Ligao para sa pagpapagamit kan pasilidad asin pagtataong daga na pagtitindugan kan saindang Regional Office.
