Sa pag-umpisa it summer season, ginaeauman ro maabung tourist arrival sa isla it Boracay.
Base sa pinakaulihing pahayag it IATF, ro bilog nga probinsya it Aklan hay kaeakip sa mga lugar sa Western Visayas nga ginpaidaeum sa Alert Level 2, epektibo ku Pebrero 16 hasta sa katapusan it buean.
Ginhayag ni Philippine National Police (PNP) Chief Police General Dionardo B. Carlos nga samtang naga haeuga ro mga restrictions, ro Tourists Police Units (TPU) hay padayun sa pagpatuman it hugot nga safety protocols base sa IATF guidelines, local executive orders ag ordinansa nga gin-isyu it LGU sa andang mga lugar.
Ro amat-amat nga pagdagsa it mga turista sa Boracay halin sa haeos daywang dag-on nga temporaryong pagpundo it operasyon sa bilog nga isla tuga it pandemya hay sangka indikasyon it uman nga pagbangon it ekonomiya sa nasyun.
Pero kadungan kara hay kinhangean gihapon nga siguruhon ro seguridad it tanan nga mga nagaagto sa isla bukon eamang sa peligro it pandemya kundi pati man sa mga nagaplano nga maghimo it maeain, suno kay PNP Chief Carlos.
Ginhambaean man ni Carlos ro publiko, eabi eon ro mga nagaplano nga magbakasyon makarung summer sa isla nga magpabilin nga vigilante ag hugot nga sundon ro ro mga safety protocols sa tanan nga oras.
Base sa pinakaulihing record it Department of Tourism, ro Boracay Island hay nakalista it 35,799 tourist arrivals sa unang buean it 2022 nga mas mataas it 200.88 percent kumpara sa 11,898 records it parehong buean ku nagtaliwan nga dag-on. / ANN DESLENE SALAZAR
