Nabingwitan sa kapulisan ang usa ka mangingisda atol sa gipahigayong pagpatrolya kalabot sa anti-illegal fishing activities sa personahe sa Municipal Fishery Law Enforcement (MFLET) didto sa kadagatan sa Davao Oriental.
Ang suspek giila nga si CLEMENTE LANZADERAS CAJETAS, 51 anyos, minyo, usa ka mangingisda, ug residente sa Prk. Waling-waling, San Isidro, Davao Oriental.
Subay sa report sa otoridad, nasikop ang suspek human nga naaktuhan kining gipang-pana ang mga isda. Misulay pag ikyas ang suspek apan naharang kini sa kadagatang bahin sa Brgy. Batobato, Davao Oriental.
Nakumpiska saiyang possesion ang usa ka motorized banca, usa ka boat engine Sumo model, 2 ka paddle, usa ka compressor, 2 ka spear gun, usa ka anchor, usa ka ice box, 2 ka diving slipper ug 2.4 kilos sa mananglahing isda nga gibana-banaang mukantidad og Php 600.00.
Gikustodiya na ang suspek sa Bantay Dagat Headquarter ug nag atubang og kasong Republic Act No. 10654 o anti-illegal fishing.
