Pinatawan ng San-En Neophoenix si Thirdy Ravena ng suspensyon at pinagmulta dahil sa damage na idinulot nito sa signboard ng isang sponsor.
Sa isang pahayag na naka-post sa website ng San-En, ay sinabi nito na nangyari ang naturang insidente noong November 14, o sa araw na nakalaro nito ang Toyama Grouses.
Dahil sa ginawa ni Ravena ay napatawan ito ng disciplinary action at pinagmulta ng 100,000 yen o tinatayang nasa P44,000.
Nasuspinde rin si Ravena para sa susunod na dalawang laro ng San-En laban sa Seahorses Mikawa na naka-schedule sa December 4 at 5.
Agad naman humingi si Ravena ng paumanhin sa Neophoenix Boosters, sponsors, management, at sa kaniyang mga teammates at coaches, lalo na sa organisasyon ng Toyama Grouses.
Inihayag ni Ravena na pinangunahan siya ng kaniyang emosyon dahil sa serye ng mga pagkatalo ng kanilang kuponan.
Matatandaan na natalo ang San-En sa dalawa nitong laro noong weekend laban sa Toyama Grouses, na team ni Dwight Ramos sa Japanese league.
