MAINITONG gituki sa regular session sa Sangguniang Panlungsod ang Christmas bonus sa mga magtutudlo sa syudad nga wala pa nahatag kanila sulod na sa milabayng 10 ka bulan.
Mihimo og privilege speech si Kagawad Franklin Gacal Jr. sa maong isyu human nasayran nga wala pa nahatag ang maong bonus nga giaprobahan nila niadtong Desyembre 28,2020 sa usa ka special session.
Matud ni Gacal, mokabat sa P2,500 ang giaprobahan nga bonus alang sa matag magtutudlo sa GenSan ug napirmahan ang ordinansa sa mayor niadtong Desyembre 30 sa parehong tuig.
Butyag usab ni Kagawad Rosalita Nuñez nga napahibalo siya ni City Administrator Arnel Zapatos nga bag-o mahuman ang tuig, ma-release ang maong Christmas bonus sa 5,375 ka mga teaching ug non teaching staff sa DepEd GenSan.
Nasayran nga gusto sa ubang konsehal nga maimbestigahan ang hinungdan sa dugay nga pag-release mao nga gipatawag si Executive Assistant Philip Pabelic isip executive assistant for education sa dugang katin-awan.
