Nunot sa paglagda sa Manifesto of Support tali sa Task Force Davao ug uban pang security units, gilaumang mapakusgan pa ang Culture of Security sa Davao City.
Sumala kang Task Force Davao Commander Col. Darren Comia, pinaagi niini mapalig-on pa ang makuhang supurta sa otoridad gikan sa nagkadaiyang tribu ilabi na sa Muslim Community.
Gikanayon usab ni Pamikirel Latip Ayunandatu Arumpac Jr., Chair sa United Muslim Council for Peace and Development, nahisubay sa pagtulun-an sa Islam ang ginadusong culture of security alang sa kalinaw.
Gawas sa Task Force Davao nipirma usab si Davao City Police Director PCol. Kirby John Kraft, Joint Task Force Haribon, mga Deputy Mayor sa unom ka Muslim Tribe sa dakbayan nga gilangkuban sa Tausug, Maranao, Kagan, Maguinda, Iranon, ug Sama nga lakip sab sa United Muslim Council for Peace and Development.
Gihingusgan sa Culture of Secutiry ang importansya sa pakiglambigit sa tanang sektor sa pagbantay sa seguridad ug pagpakgang sa terorismo. BNFM-DAVAO
