NAGAPAABOT nalang ang Ladotransco sa ilang payout sa Libreng Sakay human nga nakapasa na sila sa mga rekositos nga gipangayo sa Land Transportation Franchising and Regulatory Board kon LTFRB-12.
Sa kumpermasyon ni Public Transport Alliance of Gensan kon PTAG Chairman Robert Cang ang impormasyon nga ilang nadawat gikan sa kaulohan mabayaran na sila sulod ning bulan sa Agusto sa ilang serbisyo sa Libreng Sakay nga niabot sa P16 million pesos.
Sa milabay pa nga duha ka semana nakumpleto na nila ang mga kopya sa OR, CR ug lisensya sa mga driver ngadto sa LTFRB-12, lakip tong wala naka-apil sa unang programa nga gustong moapil.
Sa bahin sa PTAG sumala ni Cang nga walo ka tawo ang ilang nautangan aron nga makalahutay sa pagpamasada nga wala pay kita apan mabawi lang gihapon og ginansyado ang transport sector sa madawat nga bayad.
Kay sa regular nila nga byahe sa electric jeep naa lang sa usa ka libo ka pesos ang kita matag adlaw apan sa Libreng Sakay lima ka libo ang bayad samtang sa bus, dos mil ang kita apan sa Libreng Sakay anaa sa pito ka libo ang bayad, apan tungod sa proseso sa gobyerno aduna lang kalangay sa bayad.
Mao nga andam sila gihapon nga mopailawom sa programa sa Libreng Sakay ug malibre ang mga APOR ug health workers.
Kahibaluan nga gikumperma usab ni LTFRB-12 Director Renato Padua nga siguradong mabayaran ang nagserbisyo ug sa bangko ang payout. ( Ever Diazon)
