NAIMBARGO sa kapulisan ang P40, 800 kantidad sa gituohang shabu sa drug buy bust operation sa Barangay Malalag, Maitum Sarangani Province, Martes.
Sa taho sa Maitum Municipal Police Station, nasikop nila sa operasyon ang usa ka alyas Macoy, 38-anyos, taga Purok Bag-o sa maong barangay.
Gawas sa gipalit nga iligal nga droga, nakumpiska sa posisyon ni alyas Macoy ang unom ka gramo sa gituohang shabu dungan sa operasyon.
Gikonsidera usab sa kapulisan ang dinakpan nga High-Value Individual (HVI).
Giimbestigahan pa karon sa kapulisan sa lugar kung asa gikan sa dinakpan ang gibaligya niining gidiling droga.
Una nang, gibutyag ni Sarangani Provincial Police Office director Police Col. Deanry Francisco nga gipakusgan nila ang kampanya batok iligal nga droga sa probinsiya.| RICHEL GUBALANI
