COTABATO CITY – PANAHON na upang mabuo ang isa pang probinsya mula sa Maguindanao Province.
Ito ang pahayag ni Maguindanao 1st District Senior Board Member Datu Sharifudin Tucao P. Mastura, sa naging panayam sa kanya ng Brigada News FM Cotabato.
Sinabi ni Mastura na dahil sa lawak ng Maguindanao at sa dami na rin ng populasyon nito ay naniniwala sya na ang paghati sa lalawigan ay napapanahon na.
Matututukan anya rito ang lahat ng mga proyekto ng lalawigan sa oras na mahati na ang Maguindanao kung saan ang unang distrito sa kasalukuyan ay tatawagin ng Maguindanao del Norte.
Kung matatandaan anya unang nabuo ang Shariff Kabunsuan Province noong 2006 sa pamamagitan ng Muslim Mindanao Autonomy Act No. 201 ngunit pinawalang bisa ito ng Supreme Court sa pagsasabing ito ay unconstitutional.
Kampante si Board Member Mastura na majority sa mga residente ngayon ay papabor muli sa paghahating ito sa lalawigan sa pamamagitan ng isasagawang plebesito.(Jom Dimapalao)
