NAKAHIAGOM og daghanang samad sa nagkadaiyang bahin sa lawas ang driver sa motorsiklo human nahulog sa konkretong kanal sa may Bangkas Heights Toril ning dakbayan sa Davao sa milabay’ng gabii, Enero 9, 2024.
Naila ang biktima nga si Glen Tulabing, 32, nga taga- Marapangi 2, Prk 5, Toril ug gituohang lango kini sa ilimnong makahubog.
Gisubay sa driver sakay sa iyang motorsiklo ang dalan gikan Bago padulong Toril Proper apan aksidente kining na overshoot sa konkretong kanal sa naasoy nga lugar.
Daling gitabang sa Bangkas Heights BDRRMC ang biktima og gilayong gihatagan og first aid ug gidala sa Southern Philippines Medical Center (SPMC).
Kasamtangan, temporaryong gikustodiya sa istasyon sa pulis ang motorsiklo niini alang sa tukmang disposisyon.
