LAUMAN ang istriktong pagpatuman sa inspeksiyon sa mga sakop sa kapulisan sa mga simbahan karong magsugod na ang Simbang Gabi dinhi sa syudad sa Davao.
Gibutyag ni Police Capt. Hazel Tuazon ang tigpamaba sa Davao City Police Office nga andam na ang 1,200 ka mga personahe wala pay labot niini ang mga force multipliers nga mutabang sa pagbantay sa seguridad sa syudad.
Ang maong mga personahe maoy ipakatag sa 43 ka mga simbahan sa Davao City sulod sa siyam ka gabii sa pagsugod sa Misa de Gallo o Simbang Gabi karong Disyembre 16.
Dugang pa ni Capt. Tuazon, nga bisan paman og walay hulga nga nadawat ang syudad, hugot gihapon nga seguridad ang ilang ipatuman sa dakbayan.
Hangyo na lamang sa DCPO nga magtinabangay ang tanan ug dili isalig ang tanan sa kapulisan, kinahanglan nga magbinantayon sa palibot ug gilayong mureport ugaling dunay mamatikdang kadudahang butang o indibidwal.
