Natumod na sang kapulisan ang person of interest sa kamatayon sang LGBTQ member sa Sitio Agkaningay, Barangay Burias, Mambusao, Capiz.
Suno kay Police Captain Alladen Talaban, hepe sang Mambusao Municipal Police Station, ginkilala ang person of interest sa krimen nga si Noel Oloroso.
Ulihi nakit-an ang biktima nga si Rosalie Danieles sa balay ni Edwilyn España kun sa diin nagabulig ini preparar sa bisperas sang Fiesta samtang nagainom-inom.
Ginapahayag nga may nakasaksi sa indi pag-intindihanay sa tunga ni Oloroso kag ni Danieles nga amo ang ginalantaw sang mga kapulisan nga rason sa paglabo sang suspek sa biktima.
Matandaan nga yara na sa advance state of decomposition sang nasapwan ang bangkay ni Danieles sa kasagingan kun sa diin nakit-an sa magkatuhay nga parte sang iya lawas ang mga pilas tuga sang pagpanglabo.
Natalana naman ini nga igapaidalum sa autopsy.
Sa karon, nagapadayon naman ang imbestigasyon sang kapulisan agud mahatagan sang hustisya ang kamatayon sang biktima. | Judy Ann Juare
