‘BAYANI’ mao kini ang nahimong tawag ngadto sa usa ka binuhing iro sa usa ka pamilyang naapil sa pagkasunog ang panimalay kaniadtong Abril 20, 2022 alas 2 ang takna sa kadlawon sa Jurasic Purok Oblipas, Barangay Calumpang.
Si Princess usa ka Belgian breed nga gikonsiderang hero dog nga gipanagiya sa pamilyang dela Fuente ang nisalbar sa kinabuhi sa 5-anyos nga si Psalm human nga gipukaw niini ang bata gikan sa hinanok nga pagkatulog samtang nagkaguliyang na ang tanang residente apil ang iyang pamilya tungod sa makusog nga pag ulbo sa kalayo.
Gibutyag sa amahan ni Psalm nga si Roel dela Fuente, Jr. nga samtang sila nagkaguliyang na ug sa pagtuo nga nakagawas na ang tanan niyang mga anak gikan sa nasunog nilang panimalay nahabilin matud pa diay ang 5-anyos nga anak niini sa sulod og nibalik sa pagkatulog. Apan dakong pasalamat niini sa iyang iro nga si Princess nga maoy ni-ambak sa ilang katre sa iyang anak rason nga nakamata ang bata ug naluwas gikan sa pagkalamoy sa kalayo sa ilang balay.
Samtang gi-adtuan sa Brigada News Team ang veterinary clinic kung asa na-confine ug nagpaalim si Princess. Dinhi makit-an nga nakaangkon kini og paso sa tibuok nawong ug uban pang parte sa lawas. Gibutyag ni Doc. Jacquiline Madi, Resident Veterinarian sa GSC Pet Care Center nga stable na ang kondisyon ni Princess ug padayon pang ginatambalan ang mga paso nga naangkon niini. Masubo man nga posibleng dili na mabalik ang mga balahibo ni Princess apan sumala pa nga mamahimong mabalik ang pamanit niini. Sa tabang matud pa sa mga sponsors mamahimong magpadayon ang pag-uswag sa panglawas ni Princess. I MJ Fernandez
