Ginhold-up sang tatlo ka wala makilala nga kawatan ang isa ka lotto outlet kag nataban ang kapin P95,000 nga balor sang kwarta sa Bayot Drive, Barangay 9, Roxas City.
Ginkilala ang tag-iya sang nasambit nga outlet kay Nilo Hernalin, 54-anyos, residente sang Barangay Milibili sining siyudad.
Sandig sa ginpabalhag sa Roxas City PNP, ginapahayag nga samtang yara sa guwa sang outlet ang teller nga si Mary Joy Eduque, 26-anyos hinala lang nga nagpalapit ang duha ka lalaki nagasuksok sang itom nga sweat shirts, maong pants, nakabonet kag may kataason nga 5’ tubtob 5’3” nagabitbit sang hinangiban kag nagdeklarar sang hold-up.
Nakuha sang mga suspek ang benta sang ‘scratch it’ nga nagabalor sang P35,000 kag
bangud sa kakulba kag pagpamahog sa teller pati ang unod sang vault nga P60,000 ang nataban man.
Matapos sang pagpanghold-up, nakit-an ni Eduque sa guwa sang outlet nga may isa pa ka lalaki nga nakasakay sa Barako nga motorsiklo nga nakasuksok sang kaangay nga panapton ang nagahulat nga run-away vehicle sang mga kawatan.
Sa karon, padayon pa ang imbistigasyon sang mga kapulisan para makilala ang mga responsible nga kawatan. | KMD Gicalde
