GIPAGAWAS sa Department of Social Welfare and Development Office (DSWD) region-12 ang kinatibuk-ang nahatagan og educational assistance sa Soccksargen region niadtong Sabado, Setyembre 3, 2022.
Mokabat sa 5,761 ka mga estudyante ug benepisyaryo ang nakadawat sa maong adlaw nga mokabat usab sa P11,755,000 ang kantidad nga nahatag.
Sa 5,761 ka mga estudyante, ang elementary students mokabat sa 2,290, sa junior high school- 1,805, sa senior high school- 809 ug sa college/vocational anaa sa 857.
Sa GenSan, mokabat sa P1,696,000.00 ang na-release nga kantidad alang sa 779 ka mga estudyante, sa Sarangani Province- P1,338,000.00 alang sa 740 ka estudyante.
Sa South Cotabato, mokabat sa P3,3037,000.00 ang nahatag sa 1,290 ka mga estudyante, North Cotabato- P2,583,000.00 sa 1,260 ug Sultan Kudarat – P3,100,000.00 sa 1,692 ka mga estudyante.
Sa Setyembre 10 ang laing hugna sa pagpanghatag sa maong educational assistance sa DSWD sa mga student-in crisis.
Una nang gibutyag ni Restituto Macuto, Regional Director sa DSWD-12 nga mokabat sa P99-M ang budget nga gi-download sa ilang head office alang sa educational assistance sa region-12 ug sa unang duha ka Sabado niadtong Agosto 20 ug Agosto 27 anaa sa P30 million ang nahatag ug dugang sa P11,755 million niadtong Setyembre 3.
