Na-trap ang siyam ka indibiduwal human kalit na lamang midako ang ang bul-og sa tubig sa Pulang Bato Falls sa Brgy. Carmen, Davao City kagahapon sa gabii.
Gibanabanaang mubaot ngadto sa 8 ka oras ang nahimong search and rescue operation sa mga sakop sa Revitalize Pulis sa Barangay Cluster 5, Central 911, Bureau of Fire Protection, Baguio Police Station, Bantay Bukid, USAR 911 ug mga personahe sa maong barangay ayha paman naluwas ang mga nasangpit.
Sa report sa RPSB- Cluster 5 naila ang mga nasangpit nga silang Lyra Jane Laum, Vinci Barcebal, Bryan Laum, , Isiah Marven Ang, Inna Barcebal, Jessirit Marces, Simon Gaitano, ug duha ka menor de edad nga silang Jethro Gaitano, 11-anyos ug Mohajid Gentica, 10-anyos.
Daling girespondehan sa otoridad ang maong panghitabo human nag-trending ang post ni Inna Arcamo-Barcebal kong asa makita nga nagpakitabang kini nga ma-rescue human na trap sa baha.
Sa pakighinabi sa Brigada kang PLT Rizalito Clapiz III sa RPSB Cluster 5 gibutyag niini nga lisud ang dalan padulong kong asa ang mga biktima apan ila gihapon kining gipaningkamutan nga maabot.
Alas 3:40 na sa kadlawon sa dihang naluwas ang tanan og gidala ngadto sa Carmen Barangay Hall kon asa sila gipakaon ingon man gisaninaan og uga.
Mapasalamaton usab ang tanan gumikan walay nakalas nga kinabuhi sa maong hitabo. BNFM-Davao
