GIPAGAWAS na ang 85 porsyento sa ihap sa personahe sa General Santos City Police Office (GSCPO).
Kini dungan sa mandu ni Chief PNP Gen. Rommel Marbil nga pakusgon ang presensiya sa kapulisan sa kadalanan. Matud ni Police Col. Nicomedes Olaivar Jr., director sa GSCPO ang admin personnel na lang ang nabilin sa city headquarters.
Human gipagawas na niya ang naa sa 85% sa ihap nila aron mag-field duty.
Ang mga personahe ang nagpahigayon og foot ug motorcycle patrol sa mga lugar nga sagad ginadagsa sa mga tawo.
Magpahigayon usab ang kapulisan ug Oplan Galugad, Kapkap Bakal ug Oplan Sita tumong ang pag-ubos sa ihap sa krimen ug paspas nga responde.
Sa pagpagawas sa mga sakop, nagpahimangno si Olaivar nga sundon sa mga kapulisan sa dalan ang ‘highest standard of professionalism’ ug community engagement atol sa ilang duty. I Richel Gubalani
