Patay ang 82-anyos nga retiradong engineer human gipusil sa wala mailhing suspetsado samtang naglingkod sa payag atol sa pagbisita sa iyang yuta pasado alas 11:15 sa buntag, Hulyo 31, 2024 didto sa Sitio Bulahan, Brgy. Carmen, sa Syudad sa Toledo.
Ang biktima giila nga si Fedilino Adao Tinapay, 82 anyos, usa ka Retired Engineer, byudo, residente sa Brgy. Sangi, Toledo, City.
Sa inisyal nga imbistigasyon nga gihimo sa kapulisan sa dakbayan sa Toledo ubos sa pagpangulo sa ilang hepe, PLTCOL Manolo F. Salvatierra, nasuta nga ang biktima mibisita sa iyang yuta sa Sitio Bulahan, Brgy. Carmen, sa syudad sa Toledo.
Base sa saksi nga si alyas Dario, naglingkod lang sa payag sa dihang kalit mibutho ang mga suspek ug gipusil ang 82 anyos nga byudo.
Human sa pagpamusil, misakay ang criminal sa motorsiklo nga nagpa-abot lang distansya sa nahitabo-an og ang driver mipasutoy sa pagpadagan sa wala matino nag direksyon.
Gidala ang biktima sa Toledo City Hospital apan nakabsan gyud sa iyang kinabuhi.
Dugang pa sa nakasaksi, ang biktima adunay gipapahawa nga tawo nga nagpuyo sa iyang luna. Padayon pang gitino sa kapulisan ang motibo sa pagpamusil ug kinsa ang responsable sa krimen.
