LAING 62 nga mga mabdos ang gi-edukar sa saktong pag amping sa kalawasan ug pag-amoma sa ginasabak atol sa ika-31 nga semana sa adbokasiya nga End Stunting Now sa Brigada, nakadawat ang mga nahisgotan og infant kit ug uban pang mga pahalipay gikan sa Brigada.
Nabalaka man ang 15-anyos nga buntis tungod sa iyang edad apan naminusan kini sa dihang midangop kini sa Family Planning Unit sa Dr. Jorge P. Royeca Hospital.
Gawas sa mga personahe sa maong balay tambalanan nagpasalamat usab ang nahisgotan sa Brigada tungod sa mga gidalit niini nga gamit sa bata ug pahalipay.
Gihingusgan niini nga andam na siya sa mga hagit tungod iyang gisudlan ang maong butang dungan sa pagpahinumdom sa mga kababayen-an ilabi na ngadto sa sama niyang linghod og edad.
Samtang ang 43-anyos nga si Terry Tumuwo, 18 ka tuig ayha nasundan ang iyang unang anak ang nakulbaan apan malaumon kini nga mahimong maayo ang paghimugso sa iyang ikaduhang pagsabak.
may pahinumdom usab kini ngadto sa mga gustong magbuntis nga mahimong andam tungod sa kalisod sa panahon ug ang hagit niini samtang nagabuntis.
Kalabot niini mapasalamaton usab ang nahisgotan nga adunay mga adbokasiya nga sama sa ginahimo sa Brigada.
Ang End Stunting Now nga adbokasiya ang ginahimo sa Brigada sa katuyoan nga matuldokan ang nagkataas nga ihap sa mga batang susot sa nasud. I Danny Casi
