Patay ang usa ka 57 anyos nga babaye human gitigbas sa iyang kapuyo, pasado alas 3 kaganihang kadlawon, Mayo 13, 2024 sa Purok Lubi, Barangay Maghan-ay, Tuburan, Cebu.
Giila ang namatay nga si Leonila Cerado Maguate, nagpuyo sa nahisgutang lugar diin naka-angkon kini og samad tinigbasan sa iyang li-og og abaga.
Samtang na-angol sa maong insidente ang iyang anak nga si Felix Maguate Rebanuel Jr, 33 anyos human gitigbas usab sa iyang amahan nga si Felix Marquez Rebanuel Sr., 69 anyos.
Una niini, sa inisyal nga pakisusi sa Tuburan Police Station, nasayran nga sa nahisgutang oras ug lugar, samtang natulog ang ginang sa iyang lawak, kalit lang miabot ang suspek nga nagdala og sundang.
Giguba niini ang kadena nga gi-lock sa kwarto dayon tigbas sa biktima nga miigo sa iyang li-og ug sa abaga. Samtang ang anak human nadungog ang kagubot, misuway unta sa pag-uwang sa iyang amahan og inahaan, apan, gitigbas usab hinuon kini sa iyang amahan nga miigo sa iyang ulo ug sa uban pang bahin sa iyang kalawasan apan naka-dagan kini og nakapangayo og tabang sa ilang mga silingan.
Human sa pagtigbas sa iyang ka-ipon ug anak, nagdunggab usab ang suspek sa iyuang kaugalingon. Usa sa mga posibleng gitan-aw sa mga kapolisan nga motibo sa maong krimen mao ang selos.
Daling gidala ang mga biktima sa Tuburan District Hospital apan, nakabsan sa kinabuhi ang ginang samtang ang suspek, nasikop sa mi-respondeng kapulisan apan kasamtangang nalandig sa tambalanan.///