NAKAREKOBER na gikan sa impeksyon sa Covid-19 ang 56 ka inmate sa GenSan City Jail sa Lanton, Barangay Apopong.
Matud ni Jail Supt. Metz Milton Placencia, jail warden nakalabay’ng semana gihatag na sila og sertipikasyon sa Rural Health Unit (RHU). Asa napatik nga ‘clinically’ recovered na ang mga piniriso human sa pipila ka semana nga pagtinir sa isolation facility sa City Jail.
Luyo niini, bulag gihapon hangtud karon sa ‘general’ population sa maong presohan ang mga inmate. Kahibaloan nga unang semana sa Mayo dihang giangkon ni Placencia nga usa ka inmate nga babayeng gikan sa San Isidro Police Station.
Ang nasuta nga positibo sa virus dihang gihatud kini sa City Jail sa pagpahigayon og contact- tracing nadugang ang 55 ka piniriso nga positibo. Sagad sa nagpositibo mao ang mga lalaki nga edad 20 hangtud 59-anyos.
Giklaro ni Placencia nga bisan paman nakarekober na ang mga piniriso padayon gihapon ang pagbawal sa dalaw. Sa karon, misaka na sa 1,200 kapin ang kinatibuk-ang ihap sa piniriso sa male dormintory samtang 100 kapin ang naa sa female dormitory. ( Richel Gubalani)
