LEGAZPI CITY – Arestado an sarong 54-anyos na lalaki, daing agom, laborer, asin residente kan Barangay Cabunturan, banwaan kan Malinao, Albay sa isinagibong Manhunt Operation kan mga personahes kan Malinao Municipal Police Station (MPS) kan nasambit na banwaan.
An nasambit na operayson, naisagibo alas 10:30 nin pagkaaga kasuhapon, Hulyo 17, 2024, sa Brgy Balading, Malinao, Albay, sa pangengenot ni Officer in Charge (OIC) kan nasambit na hepatura na si PMAJ Nathaniel R Jacob.
An pag-arestar sa suspek naisagibo sa kusog kan mandahamiento de aresto Hon. Edwin C. Maalat, Presiding Judge kan RTC Branch 17, Tabaco City, Albay asin nahahampang sa kasong pagbayolar sa Section 11, Article II, Republic Act 91-65, o mas midbid bilang Comprehensive Dangerous Drug Act of 2002.
Maabot man sa dos cientos mil de pesos (P200,000) na piyansa an inerekomendar kan korte para sa saiyang temporamenteng libertad.
An naarestar na suspek, dinara sa Ziga Memorial District Hospital para sa isairarom sa medical examination asin maaraman kun ini igwa nin mga kamatean. Presente nang nagtitinir an suspek sa Malinao MPS para sa magkakanigong disposisyon.
