LEGAZPI CITY – Nagsairarom sa leadership training an nasa 50 mga jovenes sa Camalig, Albay sa pangengenot kan Municipal Social Welfare and Development Office (MSWDO) katakod kan pagseselebrar kan National Children’s Month.
An aktibidad igwa nin obhetong mas mapahiwas an saindang mga kaaraman dapit sa pagresolba kan mga problema, pagtatrabaho sa grupo asin an pakikiibahan sa iba dugang pa an pagpakusog kan saindang kumpiyansa sa sadiri.
Mientrastanto, may tema ining “Cultivating Little Leaders” asin an nagpartisipar na mga kaakiaan, mga edad 12 hasta 17 anyos.
Kasarabay digdi an pagtutukdo manungod sa parte kan mga jovenes sa Disaster Risk Reduction and Management, Critical Incident Stress Debriefing, Cyberbullying asin an Child’s Rights and Responsibilities.
