KORONADAL CITY- LIMANG mga nutribun adaptors sa rehiyon 12 ang isinailalim na sa training at sinertipikahan ng Department of Science and Techhnology o DOST at Food and Nutrition Research Institute o FNRI sa paggawa ng enhanced nutribun o ‘e-nutribun’.
Ang e-nutribun ay ang bago at improved version ng nutribun, isang proyekto na unang ipinatupad noong 1970s.
Ayon kay Regional Nutrition Program Coordinator Retsebeth Laquihon na ito ay mayaman sa protina, enhanced with micro-nutrients, may iron, at Vitamin A at may iba’t ibang flavor.
Kabilang sa mga certified ‘e-nutribun’ adaptors sa rehiyon ang KCC Shopping Center – Baker’s Square sa Koronadal City, South Cotabato; Enriquez & Coroza Foods Corporation sa General Santos City; Kambal Bakeshop, Tacurong City, Sultan Kudarat; M’lang Breadmaster Bakeshoppe sa M’lang; at Breadcart Bakeshop sa Kidapawan, Cotabato Province.
Hinihikayat naman ni Laquihon ang mga local government units at Department of Social Welfare and Development na suportahan ang mga adaptors sa pamamagitan ng muling pagpapakilala sa nutribun sa kani-kanilang mga feeding programs.
