BAKUNADO na ang anaa sa 400 ka Person’s Deprived of Liberty (PDL) sulod sa General Santos City Jail. Matud ni Jail Superintendent Metz Milton Placencia, city jail warden ang pagbakuna sa mga inmates ang gipangulohan sa City Health Office. Nabakunahan kontra Covid-19 ang inmate nga lakip sa A2 o senior citizens ug A3 o person’s with comorbidities.
Ang pag-una nila sa mga piniriso nga lakip sa priority list ang tungod sa pagkonsidera sa PDL nga high risk nga matakboyan sa virus.
Gumikan sa limitadong bahin sa lugar nga ilang gilihokan bisan paman ang City Jail dunay open space naa gihapon ang resgo. Nahimong maayo ang proseso sa pagbakuna tungod sa kooperasyon sa mga PDL ug sa mga naa sa health office partikular na sa barangay.
Mokabat sa kapin kulang 1,200 ang ihap sa inmates nga lalaki sa City Jail samtang gatusan usab ang ihap sa naa sa female dormitory.
Mayo ning kasamtangang tuig, dihang temporaryo nga gipaundang sa City Jail ang pagdawat og bag-ong detainees gikan sa presinto human nagpositibo sa Covid-19 ang 52 ka inmates sulod sa maong presohan.
Negatibong resulta usab sa antigen-test ang rekisitos karon sa bag-ong detainees nga makasulod sa City Jail. ( Richel Gubalani)
