NAGHATAG komento ang kapitan sa Barangay Tinagacan kalabot sa impormasyon nga nalangay ang Special Risk Allowance kon hazard pay sa mga Barangay Health Workers gumikan sila aduna usab 16 ka BHW’s ug nagahangyo sa kapitan nga mapadali ang ilang benipisyo.
Sa pahayag ni Kapitan Jeoffrey Salanio nakadungog siya sa balita nga nagapaningil ang kahugpungan sa mga BHW’s kalabot sa ilang allowance ug sakto nga aduna silay panagtagbo sa barangay ug usa kini sa posible nila nga mahisgotan.
Gidugang ni Salanio nga mahinungdanon kaayo ang trabaho sa mga BHW’s kay aduna na kini sila regular nga trabaho sa barangay unya sa pag-abot sa pandemya nadungagan ang ilang trabaho sa pag-monitor sa mga isolation facility sa mga nakwarantina.
Gidugang ni Salanio nga ang trabaho karon sa BHW’s sa ilang barangay nagatabang sa vaccination, sa immunization ug prenatal sa taga barangay.
Anaa matud pa sa dakung risgo ang trabaho sa BHW’s ug kinahanglan gayod nila ang ayuda sa gobyerno sama sa Special Risk Allowance gikan sa nasudnong goberno unya gi-download sa lokal nga gobyerno sa Gensan.
Tungod niini nagapanawagan si Salanio sa taga LGU Gensan nga paspasan ang benipisyo sa mga BHW’s dili sa pagpangdaut kondili sa tinuod nga concern ug panginahanglan sa nagatrabaho sa barangay.
Kahibaluan nga nagpaklaro na ang taga Department of Health kalabot sa mao nga isyu ug nahatag na daw ang pondo alang sa SRA kaniadto pang bulan sa Marso 2021. ( Ever Diazon)
