Nagbitiw sa puwesto ang apat na senior aides ni UK Prime Minister Boris Johnson sa gitna ng tumitinding pressure para mapababa siya sa puwesto.
Kinumpirma ni Director of Communications Jack Doyle ang kanyang pag-lis kasunod lamang ng Policy head na si Munira Mirza.
Sumunod naman agad sina Chief of Staff Dan Rosenfield at Senior Civil Servant Martin Reynolds.
Inihayag ni Doyle na apektado ang kanyang pamilya sa mga nangyayari ngayon sa liderato ni Johnson pero nilinaw niyang nakaplano na talaga siyang umalis matapos ang dalawang taon.
Nilinaw naman ng tanggapan ni Rosenfield na bagamat nagbitiw na ito sa puwesto, mananatili pa rin siyang nagtatrabaho hanggang hindi nakakaupo ang kanyang magiging kapalit.
Matatandaan na ilang linggo nang niyayanig ng mga isyu ang liderato ni Johnson sa kanyang sariling partido.
