LEGAZPI CITY – Aprubado na sa Sangguniang Panlalawigan ang apat na resolusyon kan Junta Provincia kan Albay sa isinagibong sesyon kan Martes segun kay gobernador Noel Rosal.
Kasabay sa mga inaprobahang resolusyon iyo an dugang na 67M pondo sa mga ospital kaiba an pagdagdag ki bagong doctors asin nurses, 25M man na pondo an inalokar sa social pension para sa poko mas umenos 16K na senior citizens, P100K kantidad na budget para sa developmental projects sa 720 na mga baranggay sa Albay asin 10M kantidad na burial assistance.
Dakol man na mga residente an naogma sa maray na bareta kan gobernador.
Mientrastanto, sa ibang bareta, madistribwir an Environmental Sanitation Unit kan Provincial Health Office (PHO) nin 600 na toilet bowl sa pitong munisipalidad sa probinsiya kan Albay na may hababang ranggo pag-abot sa “household with sanitation facilty”.
An pitong mga munisipalidad na makakaresibi iyo an Jovellar, Libon, Tiwi, Oas, Pioduran, Malinao, asin Daraga.
Segun kay Engr. William Sabater sa isinagibong 2nd quarter meeting kasuodma sa Albay Capitol, makakatabang an nasambitan nang paagi para maibitaran an mga helang na dara kan tubig asin pagkaon.
Sa nasambit na meeting, tinawan man ki duon ni Sabater na kaipuhan sa mga harong na magkaigwa nin sanitation facilities ngareg maibitaran an 60% kan mga helang.
