Nadala sa Polomolok Municipal Hospital ang tulo ka lalaki human masamdan sa nahitabong pagpamusil sa Polomolok, South Cotabato, Hulyo 11, ala-1:40 sa hapon.
Giila ni Police Lieutenant Redin Cuevas, deputy chief of police for operation sa Polomolok PNP ang samdan nga silang Udsad Cossain, 55-anyos, minyo, driver mechanic; Jerome Retuta, 29-anyos, minyo, mechanic helper ug usa ka Peter Espada, 41-anyos, minyo, mechanic ug parehong residente sa Purok 1, Barangay Lapu, Polomolok, South Cotabato.
Sa inisyal nga imbestigasyon sa kapulisan, samtang nag-ayo ang mga biktima sa usa ka Nissan Pick-up sulod sa compound nga gipanag-iyahan ni Normer Gonina misulod matud pa ang armadong lalaki ug kalit namusil sa tulo ka biktima.
Human sa pagpamusil, misibat ang duha ka suspetsado sakay sa sports type nga motorsiklo.
Sigun ni Cuevas, wala nila giwala ang motibo nga may kalabutan sa personal nga bangi ug sa trabaho sa mga biktima apan sa karun padayon pa ang ilang gihimong imbestigasyon kalabot sa maong insidente.
