LEGAZPI CITY – Tulong kaso an naidugang sa listahan kan mga nabiktima nin paputok antes asin sa mismong enot na aldaw kan 2024.
Basado sa datos kan Department of Health (DOH) Bicol kasuudma, kan Disyembre 29, 11 anyos na menor de edad gikan sa syudad nin Ligao an nabiktima nin improvised kanyon kun sain nagkaigwa ini nin eye injury.
Kan Disyembre 31, 51 anyos man na lalaki gikan sa syudad nin Legazpi an nagka-blast/burn injury huli sa kwitis.
Asin kasuudma, Enero 1, nabiktima man nin lucis an 6 anyos na menor de edad gikan sa syudad nin Tabaco.
Sa datos, wara man ki nairehistrong amputation o pagkaputol nin anuman na parte nin hawak durante kan paputok.
An mga biktima, tulos man naidara sa ospital para matawanan nin medical na tratamento asin presente nang nagpaparahay sa saindang mga harong.
Kun marurumduman, disperas kan Pasko, nairehistro an pinakaenot na kaso kaini sa probinsya kun sain 20 anyos na lalaking gikan banwaan kan Daraga an naputukan nin five-star.
Mientrastanto, nasa 21 mga bagong kaso an nairehistro kasuudma sa Bicol asin sa kabilugan, 33 na an mga kaso nin napuputukan sa rehiyon.
