Nagapabilin nga at-large ang tatlo ka suspek sa pagluthang-patay sa 24-anyos nga lalaki sa Barangay Concencia, Panitan, Capiz.
Ini ang ginpahayag ni Police Major Amie Bulaqueña, hepe sang Panitan Municipal Police Station sang ma-interview sang Brigada News FM Roxas City.
Matandaan, ginkilala ang napatay kay Marvin Lloyd Diestro kag residente sang Brgy. Agkilo.
Samtang ang mga ginatudlo suspek amo sanday Ryan Doconte, 26-anyos; Ralden Doconte, 48-anyos kag Divino Delfin alyas Boyet, 58-anyos lunsay mga residente sang Brgy. Quois sa nasambit nga banwa.
Nahibaluan nga may yara sang daan nga hiligut-anon ang biktima kag mga suspek kun sa diin liwat ang mga ini nga nagkit-anay sa bulangan kag didto natabo ang pagpangluthang.
Nag-angkon sang pilas sa ulo ang biktima nga gintunaan sang iya kamatayon.
Sa karon, padayon sa gihapon ang hot pursuit operation sang mga kapulisan agud madakpan ang mga suspek kag mapasakaan sang nagakaigo nga panumbungon. | Judy Ann Juare
