Nailista it Bureau of Fire Protection (BFP)-Ibajay ru 3 insidente it sunog sa sueod eamang it sang buean makarong Hunyo.
Sa datos it BFP-Ibajay, panibag-o eo man nga sunog ru natabo sa Ibajay partikular sa Brgy. Kulong-kulong sa nasambit nga banwa.
Sangka tawag sigun sa telepono ru nabaton it nasambit nga taeapan halin sa sangka residente nga nasunog ru Day Care Center sa nasambit nga lugar.
Eagi man nga gin respondehan it BFP-Ibajay apang sa pag-abot sa lugar naapula eon ru kaeayo.
Nasunog ru unang classroom, mga libro ag iba pang importante mga dokumento.
Gina banabana nga naga-abot sa P2,000 ru danayos it sunog.
Kun mtandaan, unang nasunog ru sangka panimaeay nga gina panag-iyahan ni Marites Albeno sa San Jose, Ibajay matapos nga malipatan ru baga sa dapog sa pagtug-on nga gina bana-banang naga abot sa mas o minus P50,000 ru danyos.
Samtang, naabo man sa sunog ru sangka panimaeay sa Sta. Rita Poblacion, Ibajay nga gina panag-iyahan ni Antonio Magpusao nga naga balor it mas o minus P500,000 ru danyos.
Maserte eamang nga nasalbar ru sangka myembrot pamilya sa sueod it nasunog nga panimaeay.//MARIVIC Y. ILIN
