Gipalig-on pa sa Police Regional Office XI kauban ang kasundaluhan ug Commission on Election ang pagbantay sa tibook rehiyon batok sa mga posibleng hadla sa seguridad samtang anaa sa election period.
Gibutyag ni PRO-XI Spokesperson PMaj. Eudissan Gultiano, moabot na sa 3,563 ka PNP/COMELEC established checkpoints diin nakadeploy ang anaa sa kinatibuk-ang 25, 969 ka sakop sa kapulisan ug kasundaluhan.
Sa mga established checkpoints pinakadaghan niini gipahimutang didto sa Davao Oriental Police Provincial Office-923; Davao de Oro PPO-823; Davao City Police Office-736, Davao del Norte PPO-539: Daval del Sur-467: Davao Occidental Provincial Office-75.
Dugang sa opisyal nga mokabat na sa 2,907 ang kinatibuk-ang Joint PNP/AFP Comelec checkpoint ang nalusad sukad nga nagsugod ang campaign period.
Saysay ni Gultiano nga pabiling malinawon ang rehiyon karong panahona apan siguruhon sa ilang pwersa kauban ang hut-ong sa militar nga moluntad kini hangtud mahuman ang election period.
Sa pikas bahin, moabot na usab sa 33 ang nadakpan sa pagsupak sa Comelec gun ban diin anaa sa 45 ka nagkadaiyang matang sa armas, upat ka hinagiban, ug 131 ka mga bala ang narekober sa otoridad nga kadaghanan resulta sa operasyon.BNFM-DAVAO
