LEGAZPI CITY – Duwang katawo an naarestar sa magkasuway na operasyon sa probinsya kan Albay kasuudma.
Sa Purok 2, Brgy. Inascan, banwaan kan Guinobatan, sarong 42 na lalaki an inarestar kan pulisya huli sa kasong direct assault upon agent of a person of authority.
Binisto ining si alyas “Alvin” asin residente kan kaparehong barangay.
Naarestar ini kan pinagsarong esfuerso kan CIDG Albay PFU asin Guinobatan MPS sa kusog kan mandahamiento de aresto na pirmado kan Enero 9 ngunyan na taon.
Maabot man sa PHP36,000 an kantidad nin piyansang inirekomendar sa saiya. Sa Purok 4, Brgy. 12, Tula-tula, syudad nin Legazpi, dinakop an sarong alyas “Reenan”, 39 anyos sa kinasang drug buy-bust operation.
Susog sa report, kinondusir an nasambit na operasyon kan mga personahe kan Leagzpi CPS asin nakumpiskar sa suspek an duwang sachet nin pinagtutubudang “shabu” kaibahan an PHP500 bill na ginamit komo buy-bust money asin iba pang non-drug items.
An mga naarestar na persona, kapot na kan mga otoridad para sa maninigong disposisyon.
