Boluntaryong gitahan sa duha ka nabilin nga mga detainees nga naka ikyas sa Provincial Jail niadtong August 14, 2021 ang ilang kaugalingon ngadto kang Tarragona Mayor Nestor Uy.
Gilayong gipresenta kay Governor Nelson Dayanghirang karong adlawa, August 23, sa Governor’s Office ang duha ka mga detainees nga giilang sila si Laudico Lintuan ug Gil Suga-an, parehong nabilanggo tungod kaso nga Violation of R.A. 9165 o Comprehensive Dangerous Drugs Act of 2002.
Kauban sa nagpresenta kanila si Mayor Nestor Uy kung kinsa sila unang nisurrender, Provincial Director sa Davao Oriental Police Provincial Office Police Colonel Efren Orlina, ug Provincial Jail Warden Apollo Conde.
Base sa official report, naka-ikyas niadtong August 14 ang duha kauban ang laing lima pa ka detainees. Samtang una nang ni-surrender ang lima ka detainees niadtong milabay nga semana, nagpabiling nagtago ang duha sa Brgy. Tuba-on, Tarragona, Davao Oriental.
Matod pa sa mga detainees, nahimo lamang nila nga muikyas tungod sa kamingaw sa pamilya human gibawalan una ang pagbisita sa pasilidad gawas pa sa pagkadelatar sa hearing sa ilang mga kaso.
Sa kasamtangan, aduna nay mga bag-ong kausaban sa sulod sa pasilidad, partikular sa seguridad. Gimando usab ni Governor Dayanghirang nga tun-an ang dugang pang mga lakang aron hingpit nga masiguro ang seguriad sa maong pasilidad.
Gitakdang ibalik ang duha ka detainees sa Provincial Jail human sa mga pipila ka mga proseso , lakip na ang medical ug swab testing.
