Gikustodiya na sa Kapulisan sa Nabunturan ang 19 anyos nga lalaki nga misulod sa usa ka ospital sa Nabunturan og gipang fast-drip kon gipang-paspasan og patulo ang mga dextrose sa mga payente.
Una niini, ang wala nganli nga batan-on nga taga-Magangit, New Bataan, Davao de Oro, nisulod sa likod nga bahin sa exit door sa Miguel O. Cabrera Sr. Memorial Hospital Corporation 9 (MCMHC), nga nahimutang sa L.B. Flores St., Purok 13, Poblacion, Nabunturan.
Misulod kini sa ward sa mga pasyente sa doktor sa Internal Medicine ug didto, gipang paspasan niini sa pagpatulo ang mga dextrose sa tulo ka pasyente.
Paspas hinoon nga nagpatabang ang mga watcher sa mga pasyente ug gigukod ang maong lalaki sa mga Utility Staff nga naka on-duty nga paspas nga nakadagan, apan nadakpan lamang gihapon.
Gumikan sa nahitabo, magpatuman ang nasangpit nga ospital og strikto nga pamalaud gawas ug sulod sa maong hospital alang sa seguridad sa mga pasyente ug mga kustomer.
