Miabot sa kapin 1,500 ka mga tawo nga sakop sa 300 ka pamilya ang nawagtangan ug kapuy-an human na-ugdaw ang gibana-banang 300 ka mga panimalay sa nahitabong dakong sunog sa Sitio Lawis Barangay Mambaling, dakbayan sa Sugbo kagahapon sa hapon, Nobyembre 26, 2021.
Nadawat sa ka-bomberohan ang alarma sa sunog alas 5:06 sa hapon kagahapon.
Ang sunog nga miigo sa maong residential area, giingung nagsugod sa panimalay sa usa ka Marlyn Sitoy nga giukopar ni Emie Maravillas.
Nasayran nga alas 7:12 na kini na kontrolar ug gideklara nga fire out alas 7:24 sa kagabhion nga diin nagbilin kini og danyos nga P875,000.
Miabot sa 3,500 ka metro quadrado ang apektadong luna nga diin nahurot ka ugdaw ang mga panimalay niini ug lima ka tawo ang pasiunang nasayran nga nanga angol.
Gitumbok sa mga molopyo sa maong dapit nga ang hinungdan sa sunog mao ang usa ka Rolly Siso, 39 anyos.
Si Siso gitabangan usab og kulata, gilabay og mga bato, gibunalan og kahoy ug gihapak og bisan unsa na lang nga butang nga gigamit sa pipila ka mga lalaking molopyo sa dapit gumikan sa ilang kalagot niini.
Apan dihang niabot ang kapolisan ug mipasalba, gibiyaan si Siso sa mga nagdagmal niya hangtud nga miabot ang mga sakop sa Special Weapons and tactics kun SWAT nga mao na ang ni rescue kang Siso.
