Misaka na sa 71 ka kaso sa Delta Variant sa COVID-19 ang natala sa Cagayan de Oro homan natala ang 13 ka bag-ong kaso dinhe sa syudad.
Gibutyag ni City Health Office Medical Officer Dr. Ted Yu nga gikan sa 8 ka barangay sa syudad ang bag-ong kaso.
Gilangkuban kini sa tag-tulo ka kaso sa brgy. Gusa ug Lumbia, samtang duha ka kaso sa brgy. Balulang ug tag-usa ka kaso sa brgy. Canitoan, Tablon, Carmen, Macasandig, ug brgy. 24.
Subay niini, gipahigayon na sa CHO ang halapad nga contact tracing ug extraction sa mga bag-ong COVID-19 Delta variant patients.
Gipaabot pasab sa CHO ang dugang report sa Department of Health Northern Mindanao gikan sa Philippine Genome Center alang sa status sa bag-ong kaso sa Delta variant.
Kahibaloan nga una nang gikompirma sa Department of Health-Central Office nga adunay 279 ka bag-ong Delta case sa tibuok nasod, diin 245 niini local cases, ug sa maong ihap 22 niini gikan sa Northern Mindanao.
