MIKABAT na sa 13 ang reported cases sa fireworks-related injury sa region-12 as of January 1, 2023 alas sais sa gabii.
Kini base sa update gikan sa Department of Health kun DOH-12, nga mas ubos sa 63 percent kumpara sa parehong panahon miaging tuig.
Ang mga natalang nasamdan tungod sa pabuto, ang Cotabato Province adunay 1, Sarangani Province adunay duha, South Cotabato adunay pito ug tulo sa General Santos City.
Luyo niini padayun ang panawagan sa DOH-12 nga dili basta puniton ang wala mibuto nga fireworks pinaagi sa kamot, ug kung adunay pagka-angol tungod sa pabuto gilayung magpasuta sa doktor aron malikayan ang kumplikasyon sama sa tetanus ug ubang infections.
Sa tibuok nasud anaa sa 85 ang natala nga fireworks related injury gikan sa 61 ka mga DOH sentinel hospital sukad Desyembre 31 ug sa kinatibuk-an mokabat na sa 137 nga mas ubos og 15 percent itandi sa miaging tuig sa parehong panahon. Una nang nanawagan ang mga health officials nga likayan ang magpabuto sa Pasko ug Bag-ong tuig.
