13 ka mga munisipalidad sa Iloilo ro nagapangatubang makara sa banta it New People’s Army (NPA), base raya sa Iloilo Police Provincial Office (IPPO).
Ro mga nasambitan nga lugar hay ginaturing nga “areas of immediate concern” sa ngapaeapit nga May 9, 2022 elections, base sa kumpirmasyon ni Police Colonel Adrian Acollador, IPPO director.
Raya hay mga kabanwahan it Sara, Bingawan, Lambunao, Maasin, Janiuay, Alimodian, San Joaquin, Tubungan, Igbaras, Miag-ao, Leon, Lemery, ag San Dionisio.
Nakaeakip sanda sa “orange category” sa klasipikasyon it Commission on Elections’ (Comelec) sa mga election hotspot.
Sa 13 ka mga banwa sa idaeom it “orange category” ang Miag-ao ro may pinakaulihi nga violent incident, kung siin ro mga rebeldeng NPA hay nakipagsagupaan sa mga tropa it gobyerno ku Disyembre 1 sa Barangay Alimodias. Matatandaan nga 16 ka mga rebelde ro namatay sa engkwentro.
Samtang, ro Calinog hay sa idaeom man it red category bangud sa presensya it mga rebeldeng New People’s Army (NPA) ag mga natabo nga election-related incidents sa mga nagtaliwan nga eleksyon./JIL B. LACSON
