KORONADAL CITY- UMABOT sa 114 na mga patent titles ang naipamahagi ng Department of Environment and Natural Resources o DENR Region 12 kasama ang provincial government ng South Cotabato at Registry of Deeds South Cotabato sa mga benepisyaryo sa Koronadal City kamakailan lamang.
Ito ay binubuo ng 101 na mga titulo para sa residential land, 12 sa agricultural, at isang special patent.
Ang land title distribution ay bahagi ng “Handog Titulo” program ng DENR na may layuning mapaunlad ang mga komunidad at economic productivity ng mga mamamayan sa pamamagitan ng pagpapabilis sa pagproseso at issuance ng public land patents sa mga qualified beneficiaries. Ito ay alinsunod din sa land disposition program ng pamahalaan na nakasaad sa Republic Act No. 10023 o ang Residential Free Patent Act.
Inihayag ni Provincial Environment and Natural Resource Officer (PENRO) Radzak Sinarimbo na dahil sa suspension ng land titling sa Saranggani at South Cotabato, naantala ang pagproseso ng mga titulo ngunit dahil sa pagsisikap ng kanilang mga field offices, napabilis ang completion nito.
