1 PATAY, 3-BULAN PINAKABATA SA DIARRHEA OUTBREAK; 371 BIKTIMA
MISAKA pa sa 371 ang kinatibuk-ang ihap sa mga residente sa Barangay Santiago, Caraga, Davao Oriental nga naapektuhan sa nahitabong diarrhea outbreak.
Ang mga pasyente, gipangdala sa temporary infirmary, temporay hospital sa municipal evacuation center, samtang ang mga nakasinati og seryoso nga sintomas giadmit sa mga ospital.
Adunay 14 ang severely dehydrated nga pasyente ang giadmit sa Davao Oriental Provincial Medical Center (DOPMC) sa Mati City samtang, 17 ka pasyente nga dunay moderate to severe dehydration ang anaa karon sa Davao Oriental Provincial Hospital (DOPH) sa lungsod sa Manay.
Sumala kang Dr. Chris Anthony Limen, Caraga Municipal Health Officer, padayon pang gihulat ang resulta sa gipadalang rectal swab sample sa mga biktima aron sayron ang tinood nga hinungdan sa impeksyon.
Samtang, dunay usa ka residente ang natala nga nakabsan sa kinabuhi nga nailhang si Cludualdo Tucasan nga taga-Sitio Lower Manzanas sa maong barangay kinsa unang giadmit sa Mati City Hospital apan nakutluan sa kinabuhi.
Pinakabata nga nakasinati og diarrhea ang tulo ka bulan nga masuso nga padayon karong giatiman sa ospital samtang ang ubang pasyente anaa sa COVID-19 Quarantine Facility nga gihimo unang temporary Infirmary.
Sa karon padayong nakatutok ang Provincial health office sa Davao Oriental sa sitwasyon ug panginahanglanon sa mga residente.BNFM-DAVAO
