TALIWALA sa dakong damyos nga nasinatian human sa pagbaha ug pagdahili sa yuta, mapasalamaton na lamang ngadto sa Ginoo ang mga opisyales ug katawhan sa pagpanguna ni Mayor Bryan Reganit nga walay natala nga nakabsan sa kinabuhi sa Maitum, Sarangani Province.
Ang Maitum, Alabel ug Kiamba ang nakasinati og pagbaha kaniadtong miaging Martes, Marso 8, apan ang labing apektado mao ang lungsod sa Maitum. Sa situation report ni Disaster Officer Raymond Mayled, labaw sa Municipal Disaster Risk Reduction and Management Office kon MDRRMO Maitum nga na-submit sa buhatan ni Rene Punzalan, nangulo sa PDRRMO Sarangani, anaa matud pa sa 288 ka panimalay ug 923 ka mga indibidwal ang na-apektuhan as of March 9.
Padayon pang ginakolekta ang final data ug kinatibuk-ang damage kung diin adunay mga tulay ang nadaot.
Sa initial nga pagbanabana anaa sa P130 milyones ka pesos ang damyos sa imprastraktura, wala pay apil ang sa agrikultura.
Hinuon wala nadamay ang suplay sa kuryente ug linya sa komunikasyon. Samtang nakapadangat og relief goods ang Sulong Kaligtasan program ni Gov.Steve Chiongbian Solon sa apektadong katawhan.
