Nakabsan sa kinabuhi ang usa ka plumber/welder human kini giingong na-suffocate sulod sa usa ka septic tank sa Dumanjug Public Market, sa barangay Poblacion sa lungsod sa Dumanjug, Cebu.
Giila ang namatay nga si Mark Gil Alberca Eniego, 28 anyos, minyo, ug residente sa Barangay Kanguha, Dumanjug, Cebu.
Una niini, giingong si Eniego kauban si Jerome Merenillo misulay sa pag-welding sulod sa septic tank dihang sila giingong gisuyop ug na suffocate sa wala masayri nga makadaot nga kemikal sa sulod nga maoy hinungdan nga nawagtangan sila sa panimuot.
Giingong adunay duha ka mga trabahante nga giilang sila si Eddie Marie Rellorta Aranda ug Jureme Saberon Amit misuway sa pagluwas kanila, apan tungod sa presensya sa isog nga gas ug containment sa maong dapit, hapit usab sila mawad-an sa ilang panimuot hinungdan nga nagbutang sila og blower alang sa bentilasyon.
Nasayran nga ang mga naangol nga mga trabahante dali nga gidala sa Barili District Hospital apan si Eniego gideklarar nga DOA alas 9:49 sa buntag kagahapon, Hunyo 18, 2024 sa Baril District Hospital.
Ang biktima, namatay tungod sa giingong Acute Respiratory Distress Secondary to Toxic Inhalation Injury.///
