Posibling munihit ang suplay sa tubig sa probinsya sa Sugbo kung mahitabo ang El Niño phenomenon.
Matud ni Engineer Alfredo F. Quiblat Jr.,hepe sa Philippine Atmospheric, Geophysical and Astronomical Services Administration (PAGASA) Visayas Regional Services Division, kinahanglan nga daginuton ang paggamit sa personal ug domestic nga konsumo sa tubig.
Sa pagkakarun gipahibawo ni Quiblat, nga ang Luzon pa lang ang adunay gikataho nga mga timailhan sa pagkunhod sa lebel sa mga water dam, apan dili layo nga mahitabo kini sa Sugbo.
Samtang gibutyag usab ni Minerva Gerodias, tigpamaba sa Metropolitan Cebu Water District (MCWD) nga nius-os og gamay ang produksiyon sa tubig sa Buhisan dam.
Ang Buhisan dam, maoy bugtong water dam sa MCWD, diin sa kasamtangang nag-average og produksiyon nga 3,500 cubic meters matag adlaw.//
