BNFM BICOL— Pigpahayag ni Virac Municipal Police Station Chief of Police PMaj. Antonio Perez na naka rehistro na ang saindang opisina nin labi sa benteng mga indibidwal na nagbalgar sa mga ipinapautob na COVID-19 restrictions sa saindang banwaan, partikular ang liquor ban asin ang curfew.
Segun ki Perez, 13 katao ang saindang nadakop sa primerong aldaw nin pagpapautob kan nasambit na polisiya mantang siyam na katawo man ang saindang nasita sa nagsunod na aldaw.
Pira sa mga iniyo ang pig isyuhan nin citation ticket huli sa pagbalgar sa batas trapiko idugang pa an pagkaka kumpiskar nin arak gikan sa posesyon kan mga ini.
Huli kaidto, liwat na piglinaw kan opisyal ang pira sa mga isyu dapit sa ipinapautob na liquor ban kung sain mahigot nganing ipinagbabawal ang pagbakal, pagpabakal asin pag inom nin anuman na mga nakakaburat na inumon sa laug kan banwaan.
Alagad para sa mga nagtitinda nin arak, pwede suboot kan mga ining darahon an saindang mga ipinapabakal na inumon sa ibang banwaan asin duman ipabakal.
Si mga dae makatios na dae makainom-inom asin igwang sadiring stocks nin arak sa saindang pagrugaring, pu-pwede kamong mag inom sa laug kan saindong harong alagad solo sana.
Mientrastanto para man sa mga may pinatitintihan na padangat sa buhay na nagtalikod na sa kinaban, sulamenteng mga paryentes sana an tutugutan na magbilar sa oras nin curfew.
Kinakaipuhan man na ipaisi sa barangay kung muyang magkundusir nin pasugal asin kung tugutan istrikto dapat na maipa-utob an mga eksistidong health protocols.
Marurumduman na liwat na ipina-utob kan gobyerno lokal kan Virac sa Catanduanes ang liquor ban asin curfew huli sa liwat man na paglangkaw nin mga nairerehistrong kaso nin COVID-19.###
