NABUN-OG ang usa ka miyembro sa Person With Disability kon PWD human nga gitabangan ug kulata sa mga batan-on gabei sa Agosto 19 adlaw nga Sabado.
Subay sa medical result human nagpahiling ang biktima nga si Renal Villamor sa Dr. Jorge P. Royeca Hospital, aduna kini bun-og sa suwang, sa agtang ug sa tuo nga siko sa pagpanumbag sa usa ka grupo sa mga batan-on.
Sa paghinabi sa Brigada News Team gisulti sa biktima nga gikan siya nga remit sa iyang halin sa itlog sa manok ug sa iyang pagbaktas pauli gikan sa Malok padulong sa Purok Magsaysay, Barangay Labangal kalit kini nga gikulata ug nakuyapan.
Wala pa usab nabawi ang iyang cellphone nga tulo ka adlaw pa lang niya nga napalit gikan sa iyang tinigom nga gikuha sa nangulata,lakip ang iyang kwarta nga P500 ug headset.
Sumala usab sa Deputy Chief sa Makar PNP, ilang andamon ang kasong pagpanulis batok sa duha ka suspetsado nga ilang nadakpan ug sa duha pa nga nakasibat. I Ver Diazon
