GISWERTE pa ang usa ka amahan nga gipusil sa gunman naigo sa kili-kili apan nilahos lang ang bala ug wala kini nasamdan.
Gisaysay ni Gary Pandian sa 89.5 Brigada News FM Gensan nga samtang naga-inum sila ilang balkunahe kuyog ang iyang ig-agaw ug silingan sa kalit lang may namusil, naigo ang iyang duha ka kauban samtang siya nga nitabang na-agian usab og bala sa tuo nga kili-kili.
Gipakita pa ni Gary Pandian, 30-anyos, habal-habal driver ang iyang senina nga kolor yellow unya may buslot nga agi sa bala sa ubos sa tuo nga kili-kili, init lang ang iyang nabatyagan ug sa tambalanan na niya nakita nga buslot ang iyang sanena.
Ulahi nalang nakahuna huna si Gary nga giswerte lang siya sa mao nga pagpamusil kay naigo silang Berting Pandian, 48-anyos, nasamad sa abaga sa likod ug sa tuhod samtang angol usab si Jerome Baluca, 29- anyos, minyo, mananagat nga pulos nagpuyo sa lugar.
Samtang na-trauma usab ang mga miyembro sa pamilya sa nahitabo ilabi na ang mga bata, sumala kay Merly Pandian nakita gayod niini ang pagpamusil, nakita niini ang siga sa buka sa armas sa dihang nagabuto mao nga wala siya nakatulog ug lakip ang mga bata sa pamilya ang nahadlok.
Wala usab daw sila nakaila sa namusil nga nakasakay sa motorsiklo nga XRM kolor puti ug sagol itom,una daw kini nga niagi ug nangutana kung asa ang dalan padulong sa Olarte area unya nibalik ug namusil sa nag- inum. Sumala usab kay Pastor Antonio, saba sa ilang kanto kay ilang gisaulog ang adlaw nga natawhan sa bata nga naga-edad sais anyos, adunay kaun ug adunay nag-inum ug adunay kusog nga tugtog mao nga nakalitan usab sila sa panghitabo pasado alas 7 sa gabei adlaw nga Dominggo.
