CAMARINES NORTE- Naging maayos sa pangkalahatan ang unang araw ng National Vaccination Days sa lalawigan ng Camarines Norte na nag umpisa kahapon.
Kumpara sa mga naunang pambansang bakunahan na madaling araw pa lamang ay mahaba na ang pila at nagsisiksikan ang mga tao, maluwag ngayon ang ilang vaccination center .
Sa Central Plaza Mall sa Daet, halos paisa- isa lang ang nagpapabakuna lalo na sa dakong tanghali at hapon.
Sa Basud New Sports Complex naman ay wala rin mahabang pila at maayos na naisasagawa ang pagbabakuna.
Mayroon ding ginagawang bakunahan sa mga Barangay.
Ayon sa Department of Health target na mabakunahan kontra COVID- 19 sa lalawigan ang nasa 9, 294 na indibidwal sa loob ng tatlong araw o hanggang sa sabado, March 12.
Kabilang sa mga babakunahan ang mga indibidwal na hindi pa natuturukan ng second dose para maging fully vaccinated na.
Babakunahan din ang natitirang Senior Citizen na kabilang sa A2 priority group, nalalabing 12- 17 taong gulang at booster doses sa health and economic sector.
Layon ng pambansang bakunahan sa ika- apat na pagkakataon na mapataas pa ang bilang ng mga taong may proteksyon kontra COVID- 19.
Paliwanag ng DOH, kung marami ang bakunado ay mataas umano ang tsansa na protektado ang komunidad na isa sa mga criteria sa pagbaba ng Alert Level.
